- 105 -
1474 (24. grudnia) Wrocław, w sobotę przed Bożym Narodzeniem etc.
Król Maciej Korwin udzielił opolskiemu księciu Mikołajowi oraz jego spadkobiercom przywileju monetarnego.
— Wir Mathias von gottes genaden zu Hungern und Behaim etc. kunig bekennen, so wir uns iczunt mit diszen unsern landen in Slesien eine neue moncze zu schlahen, dadurch alle andere alte und frembde moncze ab sein und verschlagen und in denselben unsern landen forthmer nicht genomen sol werden, haben vertragen, nu haben wir angesehen den groszen schaden und mergklichs verderbnus des hochgebornen unser fursten und lieben getrewen Niclass herczog in Slesien zu OpulOpole etc., darein er dan iczunder neben unser maiestat in diszen unsern krigsleuffen kommen ist, und im erlaubt und vergonnet haben und in krafft dits briefs gunnen und erlauben im und seinem erben, das seine alte moncze grob haller genant fort mehr ewigklich unverschlagen neben unser neuen monczen iren gang haben sol, also das do drei grob haller fur zwen der neuen haller gegeben und genomen sollen werden, doch also, dieweil der gulden vierzig groschen und nicht mer gelden wurde, so sol der egenante herczog Niclass und sein erben macht haben, dieselbe seine moncze grobe haller genannt nach seinem willen seczen zu nehmen in seinem lande. Auch wollen wir, das der genante herczog Niclass oder die seinen formter dieselben groben haller nimmer bei unsern lebentagen in solchem korn schlahen sondern die auf unser korn nach laut der briefe darumb ausgangen schlagen und monczen mogen.
Mit urkunt dits brief mit unserm kunigklichen insigel bekreftigt, der geben ist zu Breslaw am sambstag vor weinachten nach Cristi gepurt vierzehenhundert und darnach in dem vierundsibenczigisten, unser reiche des Hungerischen etc. im sibenczehenden und des Behamischen im sechsten iare.